أعزّك الله يا دارٍ ربينا به/ خالد المشيط

أعزّك الله يا دارٍ ربينا به=شرقي جبال الخشب والحمر شرقيه
دارٍ عزيزٍ علينا ماه وترابه=وسكَّانه أولاد الأزمل عزوةٍ حيه
يا دار حيي جديع وحيي أصحابه=الريس العام وأعيان البلاديه
هلا عدد ما أشرقت شمسه وما غابه=أو عدّ الأيام مع عدَّة لياليه
بقدوم ربعٍ تحرى الخير بأسبابه=بالقول والفعل والأخلاص والنيه
جونا على دعوةٍ منَّا دعينا به=ولبّوا ندانا لعل العزّ بوتيه
نبدي لهم شكرنا ونقدّر أتعابه=أهل الوفا بالوعد وأهل الشهاميه
يا جديع مثلك كبير الجاه والجابه=من روس قحطان نعم الشخص والفيه
اللابة اللي بوقت الحرب غلاَّبه=ساس العدم والشجاعة والفروسيه
قوم تدوس الخطر ما هي بهيابه=يرهب جموع العدو شوفه وطاريه
اللّي لهم ينتسب يعتزّ بانسابه=حيث إنَّهم منبع الجودة و اهاليه
يا جديع دار تعنيتوا على حسابه=تسّتر بقدومكم سرّ وعلانيه
والدار هي دارنا وانت الموصى به=حيث الثقة بك كبيرة وانت راعيه
مشكور يا صاحب الفزعات والثابه=مواقفك واضحه ما هي بمخفيّه
كم من ضعيفٍ وصلت رشاه وأسقابه=وخلَّيت عنه العنا تبعد مشاحيه
و اظن يا بو نهار الفعل يدرى به=والزين والشين له صفحات مقريه
وحنَّا طلبنا مجمع كان ترضى به=منكم جماله وهي خدمه جماعيه
أسوه باللي مثلنا لبيتوا أطلابه=والأمر منكم وحنَّا له رجاويه
وأسلم عسى نيتك للخير منسابه=ولعل عنكم صدوف الدهر منحيّه
وصلّوا على اللّي بعثه الله بكتابه=أزكي نبيٍ دعى للحق داعيه