الشاعر / غايب بن عبدالله العامر

فكرت بالدنيا وميزت بالناس= ونتيجت التفكير شفت اختلافي
الفرق واضح مايبي وزن وقياس=واضح لكل الناس ماهو بخافي
الناس كلن له طبايع ومرماس =والله باعماله حسيبن يكافي
رجلن يقضي وقته افراح ووناس=يروح عمره بين رايح ولافي
ورجلن بوسط المجتمع تقل عساس=وعن الحقيقه صار فيه انحرافي
ورجلن سهير مادهج عينه انعاس=ورجلن من اول غيبت الشمس غافي
ورجلن غني واعطاه ربي بلا قياس=ورجلن فقير ويمشي الرجل حافي
ورجلن على غرات الادنين بلاس=ويزيد من عنده كلا من خرافي
ورجلن ضعيف وجابره قوت الباس=ورجلن قوي لاكن بخيلن هلا في
ورجلن يقوم وقومته مالها ساس=ورجلن يقوم ويرجح الكيل وافي
ورجلن مع الخفرات واخماسه اسداس=مع الحليله مايعصاها السنافي
ورجلن تحت الاقدام يوطى وينداس=ويحسب من الي تحت ظل الرفافي
ورجلن كريم وشبت النار له ساس =ورجلن بخيل ودايم البيت طافي
ورجلن فهيم ودارسن كل كراس=ورجلن غشيم ومن الزمن جاه جافي
ورجلن حليم وجيرته ترفع الراس=ورجلن قليل العرف وقصره يعافي
صحيح من قال البشر عدت اجناس=ذكرت مما شفت بأخر مطافي
ومما ظهر علمه قبل لفظ الانفاس=ماظاهرن له عقب موته خوافي
وتمت وصلو عد ماهب نسناس=واعداد ماتذرى هبوب السوافي
على نبي بين الدين للناس=شفيعنا يوم الحشر والطوافي