شيلات الشاعر

أجرى

عملية جراحيه في أوتار ألكتف الأيسر، تكللت بالنجاح ولله الحمد بالنجاح، وكان ذلك في مستشفى الأمير متعب بن عبدالعزيز بالجوف على يد الدكتور المميز

يوم الأربعاء الماضي الموافق 26-7-1445هـ .

الحمد لله على السلامة أبو فيصل وطهور إن شاء الله تعالى

نافع محيا آل عجي

سلام مبعوث المحبه بلا شعار
من ديرتي حايل وكل البديدة
سلام يأهل الدار شيبان وصغار
ومساكم الله يالرجال السديدة
يالربع انا عندي تباشير الأخبار
ذكر الربيع بشوف عينن مديدة
الا وقبل ايّام سوقات الأمطار
حتى ارتوت نفده وسيل بحيده
والأرض كاسيها تشاكيل الأزهار
به أم سالم غردة في نشيده
والفقع يلقى في سهلها والأحجار
دار به الأنعام بقيت رغيده
وما عاد ينقصها سوى شوف الأخيار
وتشرفونا يالوجيه الحميده
تَر طرات العمر في خير الأسفار
وشوف الربيع ومعك خطو الوليدة
هي العلاج اللي تتبعه الأنظار
واستغفرالله عن سنينك تزيده
تقفون يالله مانبي كثر الأعذار
سج القدم طب النفوس الهيده
ومن بعدها وردة على الراس الأفكار
وجتني تزاحم في بيوت القصيدة
دافع ويدفعها مشاريه الاخيار
اللي على اشعاري يتابع جديده
ابشر وانا لك باللوازيم حظار
مطلبك يالعزوه من ايّام عيده
الحفل واهل الحفل وافين الاشبار
خوالي الوافين نعم البديده
منهم لكم قدر ومعزه ومقدار
اهل البلد واهل الديار البعيده
ومقدرين اللي طوى طول الأسفار
دافع وفا والوصل يبقى رصيده
حياكم الله عد همال الامطار
واهل الحفل بحضوركم هي سعيده
كل يهنى والتراحيب تكرار
عاداتهم الطيب كلن يصيده
في محفل فيه التهاني للأحرار
حمد ومفلح للحياة السعيده
ياعل يجمع بينكم رب الأبرار
وعسى الهنى درب الحياة الجديدة
يوم به رجالً المواقيف حظار
نعم الرجال اهل العلوم المجيده
في ساعة فيها تميز به الجار
له ماقفً في كل حفل يعيده
صفت دلاله تجذب الضيف والمار
مطنوخ شمر ورتكى له عضيده
لابن مطاوع طيب الذكر تذكار
له بصمت تبقى مع الوقت سيده
وصلاة ربي عد همال الأمطار
او عد ماحجة لمكة عبيده
على الرسول الهاشمي خير الاخيار
صلى عليه الله وسلم مزيده

جتني بيوت من طويل الاشابير
ابو فهد رمز الوفاء والحبابه
قاف توشحني بحلو التعابير
وتاج على راسي مكان العصابه
حقه علينا مثل ابانات والنير
قرم الرجال اللي يشرف جنابه
مدح جنابي في جميل التصاوير
ومدح ربوعي وخصني في كتابه
مشكور يامناحي عسى فالك الخير
يالشاعر الوافي كريم النسابه
اهل المضايف مكرمين الخطاطير
اهل المواقف كاسبين المجابه
اهل الحميه والعلوم المسافير
اهل البيوت مزبنة من لجابه
اهل الجوار وطيب الطيب للخير
واهل البيوت مشرعً دوم بابه
واهل هلا ويامرحبا بالمسايير
واهل الكرم ما جاد للضيف جابه
واهل المحبه والوفاء طبعهم غير
واهل المشوك لا عوتك الذيابه
رمالات يا نعم النسب والكرم مير
نعم يرادف نعم يا حي لابه
تاريخكم ما حتاج يالقرم تفسير
فخر لشمر في صحايف كتابه
ان قلت جبه يا قف الحكي يا امير
ركن شمخ بالطيب عز ومهابه
واما انت ياقرم الرجال المغاوير
يعجز قصيدي عن مدايح جنابه
دايم مجمل يا عشير المناعير
الله يعزك وانت من يعتزابه
الله يفكك من شرور العواثير
انتم فخر والدرب قبلك مشابه
ابوك جعله بالجنان المخاضير
مع الرسول المصطفى والصحابه
اللي وقف في ماقف كنه الزير
درعً لشمر دوم يحسب حسابه
اسمه بقى مضرب مثل للشواعير
حامى على شمر ولا به غرابه
رد الثناء واجب معه كل تقدير
لشخصك ومنهم بالفخر عز لابه

حق علينا نجازي الطيب بالطيب
ويستاهل العنوه ومن هو تعنا
رجل نعده من كبار المكاسيب
وافي وحنا له وفانا مثنا
انا اشهد انه من رجال المواجيب
ونفخر بمثله لا تطروه منا
هذاك ابو فالح عطيب المضاريب
رجل علومه بالوفا قبل جنا
ما كبرت راسه كبار المناصيب
ولا مدح نفسه بحنا وحنا
جمع حسين الخلق والدين والطيب
ساس عريقً بالمفاخر مبنا
الله يعزك يا عزيز المناسيب
والله يفكك من صوادف زمنا

————————-
بديت بسم الله وال المقادير
الواحد المعبود رازق عباده
ومن بعد ذكره يالرجال المسافير
الله يجمل وقفتي واجتهاده
وحي الله اللي ماحسب للمشاوير
قدم له الدعوه وهاذا حصاده
أجاب داع الحفل ماجاب تبرير
دافع وفاء والطيب يقدح زناده
واليوم غير وفرحة اليوم هي غير
الله يديم افراحنا بالسعاده
أجمل ثلاث مناسبات على خير
اليوم في محفل زواج العياده
الاوله عيد الوطن والتعابير
ذكرى بها نسمو لصرح الرياده
ذكرى بها شعب الوطن دون تغرير
واقفى عن المسلم حروب الاباده
ذكرى ألتمام الشمل خوه وتطوير
واصبح به المسلم يحقق مراده 
في عهد سلمان الحزم قايد السير
نحو التقدم والرخا والسياده
معه العضيد اللي يسوق التباشير
في رؤية عنها تلقى الاشاده
والثانيه بحضور واف الاشابير 
الشيخ أبو فيصل عزيز العماده
شيخ الزميل اللي يسوق الطوابير
وجه السعد عز الطلب باعتماده
انا اشهد انه له معزه وتقدير
عند الرجال اللي تقول الشهاده
يكفيه لامنه حضر صار تغيير
بشته يذري عن سموم النكاده
والثالثه زواجكم يالمناعير
الله يوفقكم وفال السعاده
ماظنتي يفلس هقاوي هل الطير
ماكر حرار والهقاوي مراده
ابوكم اللي ماحسب للمعاذير
كل العلوم الغانمه غصب صاده
وثنه لعبدالله عشير المناعير
ابو مجاهد سيف عز وجلاده
نعم بكم يالابتي دوم تكرير
من روس ربعي والمكارم عتاده
وخوالكم عز لنا بالمعاسير
اولاد صقر وحي ذيك السياده
درع لشمر بالليال المعاصير
نعم بهم مليون معها الزياده
تمت وصلى الله على داعي الخير
محمد المبعوث راع الشهاده

مشيت والوجهه لدار المساعيد
داراً لها بالقلب قدراً وقيمه

الله وأمانه والغلا تعرفه فيد
عندي وعند اهل العلوم الحشيمه

داراً لها بالمجد والعز تخليد
دار الرجال أهل الوفاء والعزيمه

دار الكرم والطيب دار التماجيد
دارً به التاريخ وثق قديمه

وغلاه من سكانها بالتحاديد
دام المعرفه والمواقف عظيمه

رجال تشرف معرفتهم بتأكيد
مكسب عمر وتجارتي والغنيمه

وأخص أبو محمد له العهد تجديد
أخوي جعل الله بحفظه يديمه

مالي على مثله بالاشعار تمجيد
فوق القصيد وفوق سحبه وغيمه

من عرفتي له والمواقف معاويد
واقف وقفاته كبارً جسيمه

ومن بعدها جينا على الحفل تحديد
دعوه ومن غالي وناسً كريمه

يهزنا المذرى لكم وانشدو زيد
لخراش والمرجوم ذكرى حميمه

سلام يا ربعي على العز تأكيد
ومساكم الله يالرجال الحكيمه

جينا نشارك فرحةً كنها العيد
ويا عل علام السراير يديمه

ومبروك يالصقار والفوز تعميد
أول والأول أخذه من قديمه

ما هي غريبه والدلايل مواريد
مثلك على العليا دروبه سليمه

يا بن فلاح الفين مبروك ونزيد
كل المراكز تأخذه بالعزيمه

خذيتها والعهد ترقى بها الحيد
وتصعد بها روس الجبال المقيمه

بديزرت والميراج قطاعة البيد
بشر قبيله ياولد بالهزيمه

عسى لك التوفيق والفوز وتعيد
في كل محفل والمكاسب غنيمه

دايم تشرفنا بكسب التماجيد
ايد تشيل الطير هذي كريمه

والعذر كان الشعر فيه المناقيد
دافع محبه والنوايا سليمه

قلته وانا من روس الازمل بتحديد
ربعي هل الدبوس والعز قيمه

————
سلام ياأهل القدر والجاه والشور
وبالخير امسيكم ضيوف وقرابه
وحياكم الله ي اهل الحفل وحضور
ونعم بكم ماله عدد في حسابه
وهلا هلا من دافع الحب وشعور
بضيوف ابو ياسر ومن كل لابه
يالشعر مابه عذر لو قيل معذور
اقلط وتلقى وسط جوفي رحابه
ان ما حضرت بمثل هاليوم مشكور
بعض القصيد يفك منه غيابه
دعاني الداعي ولبيت مسرور
دافع غلا من قبل عرق القرابه
يم المضيف اللي على الدرب مزبور
مدهال من هو للتماجيد جابه
ديوان شيخ بالنواميس مذكور
شيخ يشرف باللوازم جنابه
ابن علي والنعم بالفعل له دور
صغير عشيرً للكرم والحبابه
ما حسب الدنيا ولا قال مخسور
فعل اليمين اللي بعلمه رقابه
مشى على درب للاجواد مخبور
جابو علوم غانمه يقتدابه
عن ذكرهم واخاف يلحقني قصور
واعمهم بالمدح والمجد لابه
بريكات نفخر به على ما ضي الدور
لشمري نخوه وعز وهابه
نعمهم والهرج ما يلحقه زور
لا من دعى الداعي تجيك الاجابه
ومن بعدها واسوق رجلي على الفور
لرجل يسر القلب ساعة لقابه
عده لابن صنهات والطيب مذكور
يا عزوة العتبان فخر انتسابه
هلا هلا واعداد ما خط بسطور
واعداد ما تشرق وما الشمس غابه
ويا مرحبا بك عد مالطيب محصور
وانتم هله والطيب زكى جنابه
علمك يقود الوجه بالطيب مشكور
جار ورفيق وصار معها نسابه
وربعك عتيبه يا محمد لها دور
بالمجد والطولات قدر وهابه
لعتيبة الهيلا من العز دستور
تاريخ عزً في سطور الكتابه
تستاهل التكريم والجمع منصور
ورد الثناء وانتم هله يا هلابه
حفل يشرف بالمعازيب وحضور
وجمعا تنومس والبريكي وفابه
قلته عسى اني عن الاجواد مذكور
بالخير لا من المسولف حكابه
وصلاة ربي عد ما طارت طيور
واعداد ما هلت مزون الصحابه
وعد النبات وما خلط ورد وزهور
على محمد والهِ والصحابه
———