قصائد صور

حصل الشاعر

على شهادة شكر وتقدير من الجمعية السعودية للمحافظة على التراث، وذلك نظير مشاركته ومساهمته الكريمة ضمن ورشة العمل التعريفية لترشيح ملف الشعر النبطي على القائمة التمثيلية للتراث الثقافي غير المادي لدى منظمة الأمم المتحدة للتربية والثقافة والعلوم (اليونسكو)ز

جاء ذلك خلال ورشة العمل التي أقيمت بحضور كوكبة من الشعراء والشاعرات بمنطقة حائل ، بفندق الميلينيوم بجامعة حائل، بتاريخ15 – 6 – 1445 هـ الموافق 7 – 1 – 2024 م .

وثمنت الجمعية جهود الشاعر “نافع آل عجي” القيمة في حفظ وتوثيق التراث والسعي لإحيائه ونقله للأجيال القادمة، متمنين له مزيدا من التقدم والنجاح والاستمرار ف هذا العطاء.

لبيت أنا الدعوه غلا مدري إعجاب
وتبي الصحيح لكهن جيت عاني

بشاركك يا تاج راسي والأقراب
وأسعد بلقياكم وأسواق التهاني

فعلت فعلٍ مِنّه الغير مرتاب
ونطيت رجمٍ عالي له مكاني

جمعت ربعك والرفاقة والأحباب
الفعل خير والمكاسب حساني

الطيب ساسك وأنت لدرب قضّاب
ودربك على وضح النقاء والبياني

على مدار العام ما سكر الباب
وامقلط للضيف حدب الصياني

من شمر وإلا قريبين وأغراب
يعنى لبيتك يا كريم المعاني

ومعك رجال بالمصاعب والأنشاب
إخوانك اللي باللوازم تباني

ومعهم قريبين السعد عز الأصحاب
خيرة رجال يشرفون المكاني

عمامك المسعر مع باقِ الأقراب
الكل منهم له مع الطيب شاني

وريت مسعر لأوصل حزم كلاب
والله ونعم ومدحهم ما خفاني

يا حمد شعري والتحايا والأطياب
وبك الفخر يا طيب الذكر حاني

يا بو محيا لمثل هذي ملبين

واللي مثل بايق لزوم نعناله

خويك الوافي رفيق على الدين
القرم أبو ناصر كرام خصاله

حق علينا وصل ناس عزيزين
ومشاركة عوداً فرح في عياله

رجل قضى عمره على منهج زين
وفي ما قف الذرفان يحسب مقاله

أبوًلنا يشفق على الطيب من حين
هذاك أبو بايق ويا حي فاله

دعوا لحفل عادته يبهج العين
جزلين والمحفل بقصر الجزاله

سلام مني والقصايد ميادين
بالشعر والشعار يوم احتفاله

لمشاركتكم والفرح صار فرحين
جينا نهني والسلام اكتماله

في شوف طلقين القبال العزيزين
الكل منهم والمراجل رقاله

مبروك يا بايق نقوله مهنين
ولا هي غريبه بيرق الشعر شاله

أنتم سوابيق على العسر واللين
والطايله كل بجهده يناله

فزتوا بها يوم الخلايق منحين

يوم إن كل مكسبه ستر حاله

عفيه هل الحيزاء كعام المعادين
الابة اللي وافياتً فعاله

ربع على درب المراجل مضرين
ذرفان نمدحهم وهذا مجاله

نعمكم بالمدح ربع وفيين
وتستاهلونه يا رجال الشكاله

وصلاة ربي عد ما قالوا أمين
على الرسول اللي بعث بالرسالة

مشاركة في حفل الشيخ فهد بن عبيد الثنيان بمدينة عرعر مساء السبت 1/6/1436هـ بمناسبة زواج ابنه الشاب (بدر)

يالله يا منعم على كل موجود
رحمتك يا مدبر تصاريف الأيام

يا الله يا غفار يا خير معبود
لطفك وعفوك يوم تنفيذ الأحكام

جينا نشاركـ يا أهل المدح والجود
شاعر وامثل لابتي وسط الإعلام

أسوق مع شعري زهر فل وورود
وعلى طريق جدودنا عهد وإلزام

سلام يا جمع بلا حصر وقيود
بتحية وصى به دين الإسلام

ومساكم الله بالمسرات والعود
وأهلاً هلا وأعداد ما تخط الأقلام

في حفل شيخ بالمواقيف محمود
سمح القبال اللي على الطيب ضرغام|

شيخ لربعه باذلٍ كل مجهود
فهد ويبقى بالوفاء عضد زقام

نعمين با الشيخان نطاحت الكود
سنام مجداً يا عسى عزهم دام

بقيادة اللي يا بغيناه ما جود
الشيخ أبو فرحان للطيب مقدام

هم فخرنا لا صار للقول مردود
وهم عزنا ماضي وحاضر وقدام

نشارك الغالين والوصل مشدود
ونمشي لهم لو هي على سير الأقدام

حل الفرح دار به الحفل معدود

في حفلة يفخر بها كل مقدام

بدر ولد شيخ على الطيب ما عود
جدد نسابة شيخ من ماض الأعوام

مبروك يا الغالي عسى أفراحكم زود
يا بدر يا علك على خير ما يرام

وأنا أشهد أن الطيب والعلم ما رود
وهباس أبو نايف لها تاج ووسام

شيخ الربيعية على المجد معدود
فريس من فريس شجعان وكرام

والحفل في دار المكارم هل الجود
عرعر عسى عرعر به المزن هشام

في حكم أميرٍ بالمهمات معهود
ابن مساعد للعداء دوم لطام

أمن وأمان وخير فيها بلا حدود
حفظ حدود الدار والخير به دام

والحمد لله والحكومة به الزود
يعز ربك من يعزون الإسلام

في ضل عهد بالرخى دوم موجود
ولحرمة البيتين والدين خدام

راح الزمان اللي به السيف مجرود
وجمع شعوبه عقب ما صاروا أقسام

واليوم في عز على عز مشهود
يالله عساك تديمها كل الأيام

يا سعدي الحجاج يا بو مشاري
شعر / نافع ال عجي

يالشعر عندي لك علوم وقداري
رفيق عمر خوتك فاله الخير

اخذ وتعطيني بيوت نداري
من ماحتوى راسي بزين التفاكير

واقدمه قدم الرجال الضواري
هدية مني بحلو التعابير

وانا ليا هوجست صدر قراري
الدرب كشاف الهموم المعاسير

يطري علي والبال فيه الطواري
من غير حاجه لو نسوق المعاذير

خط الشمال تطيب معه المساري
ليما تبين الجوف فوق الحمارير

لشرق اللقايط يمك ذيك المحاري
منصاك بيتً مدهلً للمسايير

بيت لابن عمي على الطيب ضاري
ساس قديم ما اخلفوه المناعير

يا سعدي الحجاج يابو مشاري
نعم بكم يا عزوتي بالتذاكير

العز في وجهه تشوفه مواري
ومع الخلايق نال حشمه وتقدير

ومع الجماعه في طريقه جهاري
ماذكر تأخر عن لزوم المناعير

علمك يسر البال فيه افتخاري
وبه يرتفع راسي مع كل تقدير

عن مانكنه يا فتى الجود داري
ترفع لك البيضاء من الجوف لنير

عم الجماعه دون ذكر اختصاري
ربع لهم بالصدر يالقرم تقدير

عيال الازمل طيبين المحاري
نعم بهم من لابة تتعب الغير

بالطيب محداً للرفاقة مباري
اهل هلا ويامرحبا بالتعابير

بمجالس ياعزوتي له قداري
مدهل شبوخ دوم ورد ومصادير

وصيانين حاشة كبار الفقاري
سلم لهم ما حسبو للمخاسير

وفي عازت الدنيا بوقت العزاري
ادناهم اللي ماقفه طيت البير

عزاً يرفرف في وجيه الضواري
يامن جنابك ما تجيه المخاطير

يا جيتهم تدله وتنسى العذاري
ويطيب كيفك من جميع المشاوير

خط القلم ماملاه فكري جهاري
من راس راسً يهتوي للمسافير

دعوة زواج

قضيت لزومك يا ابيض الوجه تشريف
والله يوفقنا لقضيت لزومك
نطيب من طيبك ولابه معاريف
يا طيبً بالطيب طابت علومك
حسن التعامل مع ثبات المواقيف
والطيب والفزعه وهذي سلومك
الله يفكك من شرور الصواديف
والله يفرج يالازيمع همومك
نافع العجي

بالشعر لا تبخل أنا جيت لك ضيف
وأنته كريم تقدر اللي يهومك
احضر لنا من زين هاك التواصي
يا مسندي تقفى تر اليوم يومك
قال ابشر ابشر وابعدن التحاسيف
وما عاد والله يالازيمع نلومك
في مدح من له داخل القلب توظيف
عز وفخر وقدر ومحبه رسومك
تستاهل الله يقبلك دون تزييف
وعسى ثوابك في صلاتك وصومك
ويالله عسى دايم تجي لك على الكيف
وترتاح تهنى في صلاتك ونومك
احمد بن فهد الازيمع

بدون تعليق… أرجو قبول هذه الهدية المتواضعة
يا أبو فيصل
نقشت بحرفي الباكي سبايب لوعة الذكرى
أبي ايحس في حالي إلا ياليت لي يدري

حبيبي ليه متغيّر الا ياليت لو يدري
الا ياليت لو يدري غرامه ساكن صدري

حبيب العمر ما غيره يطيب بليلته مسري
ولو ناداه خيط الفجر أنا ردي تره يدري

ألا ياليت لو ندري وش المنخفي لنا بكرى
فلا يشره ضمير به غرامه دايم يسري

عضيدي نافع الدنيا علامه وجهها حدرى
تفرقنا عقب ما كان نومه دايم حدري

ألا ياليت يا نافع جروح القلب بي تبرى
ولكن لو بدى جرحي فضحني هالجسم مبري

تغيّر طبعه الوافي تعلم صاحبي الغدرى
ولو بحلف يا بوفيصل على باله فلا نطري

تغيّر آه وهمي ألا ياليت له عذرى
ولكن لا نشدته قال حكم الوقت عذري

ألا وأن كان باع الود حنان الود له مشرى
نلاقي بالبشر مو في على لحظة وفاء يجري

ولكن شره المغلي تصير عنه المذرى
وشفّ الروح من فوقه ولو يشكي بها صبري

نقشت الحرف من حزني وعين الليل بي تقرى
عضيدي نافع أهمومي تبيع بقلبي وتشري

أنا ما بي تقول أنسى مساري الليل والقمرى
أنا ما أنساه لين أنسى بها الدنيا هدف عمري

أبي منك الفزع عيت تفارقني هاك الذكرى
ابي رايك وعلمني متى عن حالتي يدري

وتقبل تحياتي وأشواقي….. وفقك الله في حياتك العلمية والعملية
وتمنياتي لك بالحياة السعيدة
أخوك/ أبو فيصل الغزل

سبايب لوعة الذكرى
سبايب لوعة الذكرى… دموع العين لي حبرى
سبب شاكي شكى حاله … على يا خدي من بدري
قعدت أسامر حروفه … أرددها مع الفجري
يعيش الهم مع همه … على أنغامه بدا يسري

مضى ليلي مع أحزانه … اعايشها مع الحسرى
أردد لوعة الشكوى … وحله يا سعد شعري

يدك باليد يالصاحب … على ما كان لك يطرى
فلا أجع يا سعد والله … لو أنه به قضى عمري

ابفزعلك ولو للموت … نمشي يا سعد مسرى
من أجلك نمشي الأخطار … ولو أشوف به قبري

تقول ان خلك … يا سعد يطري الهجرى
علامه يا عزيز النفس …ويش اللي يا سعد يجري

أنا بنصحك يالصاحب… تساهل يا سعد حذرى
أخبرك رافع راسك … وظني ما بعد يطري

إذا كان من كيفه … يشوف اللي لهم يطرى
وحلك من هو شخص … يبيعك لغيركم لشري

حبيبك من مشالك… بليلة العتم والقمرى
حبيبك من يبني قربك… وغيرك له فلا يطري

حبيبك من مشى لرضاك… وهذا يا سعد بشرى
وإذا واعد فلا يخلف … ولقربك دايم يجري

علامك ما تبي تنسى…رفيق الغدر والعذرى
علامك ما تبي تنسى…عن اللي ما عنك يدري

مثل ما نساكم…يا سعد وانكر العشرى
ترفع بنفسك عن هوى…الخبث والغدرى

ونامثلك وقلبي به…من الوين ما يطرى
من اللي يا حكى ياخوي… له ينشرح صدري

حبيب إذا ناضر…بنضره عينه السجرى
ولا منه نضري… قلت مستسلم أنا بدري

تبعت ارضاه يالصاحب…وهو عن حالتي يدري
وزاعلت الخلايق كلهم…من يسبب عمري

ولكنه تنكرلي… نسيني يا سعد حسرى
نسي خله تنكر له… وهذه عادة الغدري

تركته يا سعد ولله… ولا خوى لي يطرى
أعز النفس يالصاحب… عن اللي باعني بدري

ورحلت بعيد يالصاحب…وحزني رافق المسرى
تحداني زماني… يا سعد وين يا عمري

كلمات/ نافع محيا العجي

قال أبو فيصل
يا سمي طال الوقت وأنا تحرى
وارجي ولكن يا سمي بالرجاء فاد

واليوم حالي يا سمي ما تسرى
هم وعذاب وضيقه الصدر تزداد

ضاقت بي الدنيا ولا لي مفرى
غير أني اطلب فزعتك يا بن الأجواد

دارت علي دنياي وقته بضرى
وصارت بوجهي واعلنت حرب واجهاد

وأنا انتظاري طال صبري تبرى
عجزت لا قاوم انا الضيم بعناد

أشهور يا مشكاي دايم تمرى
ولا منه مرسول ولا منه ميعاد

مدري علامه وليش خلي تطرى
عسى نوايهم على الخير تنعاد

قال أبو فصيل حاله اليوم شرى
ولا غير أبو فيصل على الطيب بعناد

كلمات الشاعر/ نافع العجي

هم المحبة
هم المحبه في ضميري تطرّى
من غالي يشكي عذابه والانكاد

يقول حالي يا سمي ما تسرّى
لا هانين عيشي ولا ذقت مرقاد

يشكى من اللي عن عيونه تذرّى
نسى المكان اللي لهم صار ميعاد

أبشر بسعدك وما تودة يقرّى
يجيك شفك وأنت هاني بمقعاد

إيمروانا لك يا عضيري مسرّى
ما هاب لجلك قول عاذل وحساد

آصله لوحط القمر له مقرّى
ولو شمس ربي حطها أرض وبلاد

ولو نيته بالشر لغيره تجرّى
ونجيبهم بالود ولو هو من الأضداد

دامك قصدت ما طرا لي تدرّى
لو العزم يثنى ترى لجلك ازداد

لا شك ولكانه معك ما تحرّى
ولا راجي وصلك على ويش ينعاد

خذها نصيحه كان خلك تبرّى
نسيانهم ينسيك ناشد ونشاد

جاك الجواب اللي بظرفه مغرّى
حرف لهمك به صدى الهم رداد

كلمات الشاعر/ سعد جزاع الغزل

ابيات مرسله للصديق ربيع شولاح الشلاقي عام1414هـ

يا بو حنان القلب شارد ورحال
وليا نهيته قال مالك ومالي

يم الديار اللي به الطيب نزال
دار الكرم والجود دارالرجالي

دار سكنها مله القلب ميال
خل خليل صادق العهد غالي

ردي بوصله لاكن اليوم ما ضال
دونه حدني نايفات العوالي

شكيتلك يا مسندي ونت حلال
حلال قالت عراض ثقالي

من لابت يا خوي لا ذكرها حال
به نفتخر والراس مرفوع عالي

نافع العجي

الأخ العزيز… نافع محيا.. أبو فيصل تحية طيبة
وهذا رد على قصيدتك التي أسندتها لي، شاكرا لك مشاعرك
جاني جواب صاحبه يشكي الحال
خلّه دمر حاله وأسهره بالليالي

يا مرحبا عداد ما وادي سال
واعداد حبر بالأوراق سالي

يا مرحبا يا مرحبا يا طيب الفال
يا من لكم تاريخ أول وتالي

من لابه ما حاشها عرق الأنذال
أنتم كما نور بظلام الليالي

يا بو فيصل لك بالقلب منزال
يشهد على قولي عظيم الجلالي

وشكيت لي اليوم هم وغربال
وهمك يضايقني واشعل بالقلب صالي

شكيت لي فرقا زين الاقبال
حبه بقلبك أظنة ثقل الجبالي

لا لا تلوم القلب ولا تضيّق البال
قلبك يبي خله ومن الصبر خالي

اصبر لو شفت بالحب آلام وأهوال
كانك عن حبيبك ما انته بسالي

واصل حبيبك كانه يبغى الوصال
وكأنه يتغلا يخلا كل غال

وابشر وأنا افديك بالحال والمال
ما أقول انا رح دوّر بدالي

هذا وأنا بدنياي راحل ونزال
كله على شان من سم حالي

غروٍ جماله به الشعر ينقال
وافرح إن جاء لسميه مجالي

واقبل تحياتي عدد مزن همال
وإعداد ما ينبت بأرض الشمالي

وتقبل خالص تحياتي ودمت بخير
أخوك/ ربيع شولاح العريب