الشاعر نافع آل عجي

الرئيسية قصائد مكتوبة النصيحة

النصيحة

Written by

admin

in

يالله طلبتك يا سريع الاجابه 
يا واحداً تعلم خفى كل  مكنون 
تقواك تجعلها لحالي زهابه 
رحمتك يارب الملاء نطلب العون 
ومن بعد ذكر الله بديت الكتابه 
وسجلت من جزل التماثيل بفنون 
تجارب الدنيا توضح كتابه 
نصايح للي لها يستفيدون 
يافيصل الدنيا سريع اقتلابه 
لا تنخدع به كل يوم لها لون 
رحلة عمر عزاه من هو شقابه 
ناس نزيل ومثلهم ناس يمشون 
دامك تخاف الله وترجي ثوابه 
رب العباد اللي له الخلق يرجعون 
ماخاب من يرجي عزيز جنابه 
رب نصر رسله على قوم فرعون 
سكر اذانك وترك اللي هذابه 
وامش بطريقك واترك اللي يهرجون 
ترى الرسول المصطفى والصحابة 
هم جاهدو للخير والحق مصيون 
والخير درب ما نقفل دوم بابه 
وتر الحظيظ اللي له الناس يدعون 
أم الذي هرج النقيلي زهابه 
يا عزتي له من زهاب يحملون 
في دنيته ما صاد خير مشابه 
وبالاخره موعود باللي يعملون 
خاو الذي بالدين كرس شبابه 
ومشى على نهج به خير موزون 
والدين ميزان الرجل في خطابة 
والصدق منجاة لناس يعرفون
واحسن ضنونك بالبشر بالاجابه 
وكل على مابداخله لك يبيحون 
واللي تصيد بالخطاء صك بابه 
جنب عنه والناس للحق يمشون 
عليك باللي لا وقف له مهابه 
يعجبك والوقفات له ناس يافون 
وان شاف زلة صاحبه مابدابه 
يدمح خطاه وباقي الخلق يخطون 
والاجتهاد احرص على طرق بابه 
وترى الخطاء وارد لناس يعملون 
ومن لاعمل ماخطى ولاحدا درابه 
والفرق شاسع والمخاليق يدرون 
اليوم وقت رابح من نجابه 
أواخر الدنيا والانسان مفتون 
الحق شمسه لكثر الناس غابه 
واللي يقول له الحق مخطي وممهون 
سيل جرفنا ماحسبنا حسابه 
ورحنا حسافه مع سوالف يقولون 
الامر كله صار فيه التشابه 
ولا تعرف الصاحي ولا ذاك مجنون 
كلن يقول الحق بيدي نصابه 
والناس راحت بين ميت ومطعون 
شف وش حصل للشام واقراء كتابه 
وقبله وقبله والتجارب لك عيون 
الله يعز الدين واللي مشابه 
واللي حكم به وبالمضامين يمشون 
ويستر علينا من رموز العصابه 
ويفكنا من شر حاسد وملعون 
يالله نصرك وانت راع الاجابه 
للمسلمين بكل دار يحلون 
وصلاة ربي عد هامل سحابه
على الرسول أعداد ما لناس يدعون

Comments

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

More posts