نحمد اللي بدل الحال من حال بحال/ للشاعر خالد المشيط

نحمد اللي بدل الحال من حال بحال=وعاد للنفس العزيزة وريَّح بالها
إبتدل عصر الجهل والتجاهل باعتدال=و إجتمع شمل القبيلة وفض أشكالها
و إعتدل جو الصراحة على حسن المثال=وصارت الديرة فخورة بطيب رجالها
ومن بعد هذا نقدم تحيات جلال=من قلوب صافية وافية باقوالها
للعزيز اللي مقامه كمال في كمال=موقفه تاج على روسنا يزهالها
أعني المذكور ناصر عسى أيامه طوال=العضيد اللّي ثقيل الحمول أشتالها
صاحب الفزعات والجاه صدَاق المقال=وعند ساعات الشدايد تسر أفعالها
بالقريب وبالبعيدين له دور يقال=ماضيٍ بالناس طيبه وطيب أعمالها
وكم وقف وقفات عزٍ توارت بالجمال=نال به مرقاب عز ينوط وصالها
ما يناله كود رجل قوي الإحتمال=والكسول يتابع الهون ما يقوى لها
وينتمي ناصر لربع بهم طيب و عدال=وخوّةٍ بالوقت هذا قليل أمثالها
أبي أشيد بمجدهم فوق ما علاَ وطال=ناصرٍ وأخوان ناصر وثمّ عيالها
يا عسى بهم الكفا والوفا في كل حال=حيثهم ذخر لنا عند ما نلجا لها
وساسهم من ذروة المجد عمَان وخوال=انشد التاريخ ينبيك عن تفصالها
وفايزين عن أكثر الناس من عدة خصال=الشجاعة و الصخا والكرم من مالها
ومن كبار أولاد الازمل ليا حل المجال=لابة عند اللوازم تطول إحبالها
يوم صولات البوادي حماهم ما يطال=كنَهم مزن تردم يريب خيالها
يا زمى جمع المعادي زموا مثل الجبال=وعوَد الباغي بخوفه وخيبة فالها
يا خذون الحق بالعق يا حل الجدال=وتختـلط عقالها مع وسط جهالها
وجارهم لو جار ما عاد يحسب له خمال=حاكم في طبعهم قدرها وجلالها
والخوي يميزونه بتقدير و نفال=وحشـمة بيـن الملا وافي مكيالها
وصبرهم عند البلاوي مثل صبر الجمال=الضعيف وبارد العزم ما يبرى لها
وشيخهم شيخ القبيلة ولا عنه إعتزال=شيخ سبع جموع بالوانها وأشكالها
نفتخر باسمه وذكراه معنا لا تزال=وعالي قدره وقدر العزاز أنجالها
حيثهم راس القيادة بجولات القتال=يوم عركات تروع القلوب أهوالها
لين جاء الحكم السعودي وغيَر به و ازال=بدَّله بالأمن والخوف عنه أزالها
و حكَّم الشَّرع المطهر على كل العمال=وصكت الابواب دون الجهل بأقفالها
وختمـها مني سـلام عدد طـش الخيـال=للحضور و صاحب الحفل اللي جينا لها