ياعنك جلسة ساعة عند نزال

يا الله ياهادي على خير الاعمال=ياللي عيونك ساهره ما تنامي
سامع دبيب النمل في مظلم اللال=على الصفا الصما بليلٍ ظلامي
انك تعز اللي يشيلون الاثقال=مثل أبو عبد الله عزيز المقامي
اللي ليا جيته غدا الهم و إنجال=وتشوف قدرك بالوفاء والتمامي
بالمجلس اللي منظره عز واقبال=عند الدلال المتعبات الحشامي
ياعنك جلسة ساعة عند نزال=تسوى حياة العفن خمسين عامي
وش يجمع اللي موقفه يبهج البال=للّي مواقفهم تحل الحزامي
الناس لو شفته تشابه بالأزوال=بالفعل مثل النور عند الظلامي
ناس على الواجب يحوشون الانفال=وناس على الواجب تحوش الملامي
وعفن السجايا ما نحطه على البال=ونحب من له بالمراجل مرامي
مثل أبو عبد الله يحييك بالحال=ويقوم بالواجب على أحسن مقامي
اللي يقود الوجه في كل الأحوال=ودائم على الطرق الحميده يحامي
نشا عليها في شبابه ولازال=متمكنٍ منها برأس السنامي
عمَّال بيته للمسايير مدهال=حيثه كريم ويدهلونه كرامي
للحيل ذباح وللزاد بذال=وليا وعد يافي بوعده لزامي
وعند اكتراب الحبل ما هو بملال=ويرد كيد المعتدي من شمامي
مواقفه معنا عريضات وطوال=عند الفراغ وعند وقت الزحامي
ونكن له بالصدر تقدير و إجلال=ومحبةٍ تبقى دوام الدوامي
وذكراه معنا ما بقينا على الحال=وعليه منَّا كل يوم سلامي
الطَّيِب اللي طاب بالحال والمال=وابعد عن الطرق الرذيله وشامي
نطلب عسى أيامه تمادى بالامهال=في جاه من بامره يسير الغمامي
وصلوا على اللي خصه الله بالارسال=نبينا المعصوم خير الأنامي