الشاعر نافع آل عجي

الرئيسية شعراء آل عجي الشاعر عقاب عبيد الطعيميس اركان الشعر والطبيعة — عقاب الطعيميس

اركان الشعر والطبيعة — عقاب الطعيميس

Written by

admin

in

بديت باسم العالي النافع الضار = محي فتيت ٍ باليٍ داخل لحود
سميت باسمه في بدايات الاسطار = والشعر له دافع ورغبات وبنود
ولا كل من ترجم احاسيسه اشعار = يلمس عقول ٍ من الفطن تجني الفود
لابد من سيل العواطف بالافكار = وذاك الخيال اللي على الجم مهدود
ولفظ ٍ جزيل ٍ يمه البال يندار = ومن الطبيعة توج الحرف بورود
ومن الطبيعة اقتبس لون وشعار = حسن الطبيعة شوفها يجلي نكود
ورتب معاني قبل الاصدار = عذب المعاني سوقها يبرد كبود
واوزن حروف الشعر عن كل عثار = عن خوف بلقى بالتعابير منقود
قصيدةٍ تنحت على صم الاحجار = تسوى دواوين بها الضعف مشيود
نحت الشعر فوق الصفا يترك آثار = والخط فوق البيد ما عنه منشود
الدر غالي وموطنه وسط الابحار = ولا كل من غاص البحر يجني الزود
ولا تظلم بشعرك ترا الوقت دوار = يلفح ضميرك من عنا الوقت موقود
تلقاه في دنياك يا صار ما صار = ما ينفعك شعر ٍ به الظلم مشدود
او يدخر لك يوم روغا ت الابصار = تلقاه في يوم به الفعل مرصود
والكامل اللي عالم ٍ مد الاعمار = سبحانه اللي عالمٍ كل مجحود
وأنا هوى بالي ليا قيل مطار = وسحبٍ تراكم حاضيه هزة رعود
تلمح شعاع البرق مع وقت الاسفار = لمعة صقيل ٍ شاطر الحد مجرود
واستثقل المركوم وانهل حدار = والديم صافح مضمي الارض والعود
يروي ضما قاع ٍ خلت نبت الاشجار = ياما هيار النفد يروى عقب هود
والسيل يجرد من عواليه زجار = احس زجره يردع الهــــــــــم والكود
دلىَ يدك الحزم كنه يبي ثار= واطراف هوشاته بعيد ٍ له مدود
وقمت اتخيل لوحة الارض بازهار = وبراد ذعذاع الهوا هبت النود
انا اشهد انه شوفتن تجلىَ الاكدار = يطرب لها قلبٍ به الهم معقود
البدو تفرح والذي ساكنٍ دار = حتى الغريب اللي من الهجس مضهود
لو شافها شيخ ٍ من العجز ما ثار = ينسى زمان ٍ وده يعود
واخر مصير الحي لو طال باعمار = مترين من جوف البسيطة له حدود
ويالله عفوك يوم نرحل من الدار = تجعل جنابي عن لظى النار مبعود
وجميع مسلم تبعده عن لظى النار = قولوا معي آمين من غير معدود

Comments

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

More posts