قصيدة الشاعر محمد المتعب المرمش

سميت باسم مكون المستحيلات=اللي على خلقه رقيب كفيلي
محي العظام الباليات الرميمات =جل جلاله كل صبحٍ وليلي
ومن بعدها للشعر وقفه وحزات=والفعل للقيفان أكبر دليلي
يا هاجسي من غيهب الشعر لي هات=اترك عذافه هات منه الجزيلي
في ذكر من هم يدركون الجمالات =يشوش رأسي يا ذكرت الزميلي
بيت الشعر مبني يشادي لبانات=في خشم أجا غرب السفن والمسيلي
في مفرق ملم للاتجاهات=يعني تفوته لا - ذا- مستحيلي
اقلط وتلقى فيه كل الوناسات=عند العجي طيب وعلمٍ فضيلي
عاشو عيال عجي مابه مجاجات =أقولها من قلب والله وكيلي
رجالٍ ربت بالعز من فايتٍ فات= لليوم والمنهج عدل ما يميلي
صغيرهم ينشأ بفعل الكرامات=وكبيرهم شيب بعلمٍ نبيلي
ولا هي غريبة والمواقف قديمات=أمجادهم جيل يعده لجيلي
من أولاد الأزمل يوم للفعل جولات=نعم بأهل الدبوس فعله مهيلي
وللجار والخوه دلايل وشارات= يصعب على عده ولا تستويلي
معهم على كل المراجل شهادات= ولا خير في هرجٍ قليل الحصيلي
ومن جاهم يبغى الفزع والوجاهات=يبشر بعز ولا لهمه يشيلي
ومهما نقول من البيوت الثمينات=ما نلحق الأجواد بالطيب ميلي
وعموم شمر بالكرم والمروات=لهم مقام بالقبايل جليلي
والناس كل له طبايع وعادات=أدخل على اللي مايرد الدخيلي
واشكر إلهي ثم روس القيادات=اللي لنا عن الشر ظل ظليلي
حكامنا آل سعود في كل الأوقات= حكموا بشرع الله وحده الصقيلي
قلته وانا من لابةٍ له مقامات= ربعي ذرى راسي عيال الغفيلي
وصلوا على سيد البشر بالنهايات=ما غرد القمري برأس الطويلي